Sa tulong ng Department of Trade and Industry, ang paglikha ng papel mula sa puno ng saging ay malaking ambag para makalikha ng trabaho sa bayan ng Benito Soliven sa lalawigan ng Isabela.
Karaniwan nang makikita ang saging na nakatanim sa 1,209 ektarya ng nasabing bayan. Ang mga klase ng saging na naririto ay ang lakatan, damilig, at saba ti sunggu kung tawagin sa Ilocano o ang saging ng unggoy na may matibay na hibla. Sa mga ito, higit nilang ginagamit ang damilig.
Mula sa katawan (trunks) ng mga puno ng saging, ito mismo ang pinagkukunan ng banana fiber para makalikha ng banana twine o yarn at handmade banana paper.
Ayon sa mga manggagawa, mas maraming fiber na nakukuha sa pinakaloob ng katawan ng saging na mismo nilang ginagamit habang ang panlabas na parte nito ay makapal at mas matubig kaya hindi gaanong napakikinabangan.
Bago makalikha ng banana yarn ay hinahaluan din ito ng cotton na karaniwang galing ng Ilocos. Samantala, ang banana paper ay ginagamit ding materyales sa pagliha, halimbawa, ng lampara kung saan ang shade nito ay yari sa papel.
Banana fiber, dagdag tulong sa ekonomiya
Ang ganitong hanapbuhay ay kumakatawan sa isang makabuluhang pag-unlad sa parehong sustainable practices at local economic development.
Ayon sa kaugalian, ang paggawa ng papel ay lubos na umaasa sa kahoy mula sa mga puno, na nag-aambag sa deforestation at pagkasira ng kapaligiran. Gayunman, ang makabagong paggamit ng mga puno ng saging, na kadalasang itinuturing na agricultural waste matapos anihin ang prutas, ay nag-aalok ng eco-friendly na alternative na gumagamit ng renewable resources.
Ang handmade banana paper. (Kuha ni Ann Esternon)
Ang pamamaraang ito ay hindi lamang nagpapagaan sa mga masamang epekto sa kagubatan ngunit pinahuhusay din ang halaga ng pagtatanim ng saging, sa gayon ay lumilikha ng isang mas sustainable agricultural cycle.
Sa ganitong paraan, ang mga komunidad ay maaaring mag-ambag sa pangangalaga sa kapaligiran habang sabay-sabay na nagpapaunlad ng isang bagong industriya na maaaring makabuo ng trabaho at magsulong ng economic diversification.
