Ang Guinakit Fluvial Parade ay isang tradisyong masigla at makulay na huling bahagi ng limang araw na Shariff Kabunsuan Festival na sinimulan noong Disyembre 15, 2022 at nagtapos ng Disyembre 19, 2022.
Sa pre-program, may grupo ng mga mananayaw na nagpamalas ng makulay at dramatikong sagayan. Ang sagayan ay isang Maguindanao war dance na tradisyunal na ginagawa para sa pagpapagaling, na sinamahan ng isang ritwal, gayundin sa malalaking pagdiriwang.
Sa taunang Guinakit Fluvial Parade na hinahangaan, masasaksihan ang paggunita sa isa sa pinakamahalagang kabanata ng kasaysayan ng lahing Pilipino.
Sa naturang parada ay isinasadula ang pagdating ni Shariff Mohammad Kabunsuan sa pampang ng Masla Pulangi na ngayon ay kilala bilang Rio Grande de Mindanao, na mahigit limang siglo na ang nakararaan.
Ang salitang “guinakit” ay nangangahulugang convoy o grupo ng mga bangka.
Ayon sa kuwento, si Shariff Kabunsuan ay anak ni Shariff Alih Zainal Abidin at isang descendant ni Propeta Muhammad S.A.W. mula sa Hadramount na Katimugang bahagi ng Saudi Arabia na lumipat sa Malaysia. Siya ay umalis sa Johor kasama ang kanyang mga tauhan, sakay ng kanilang mga bangka, at kalaunan ay dumaong sa Mindanao. Nakilala niya ang mahahalagang personalidad tulad nina Tabonawe at Mamalu—ang mga ninuno ng mga Maguindanaon.
Ang Guinakit Fluvial Parade ay sinimulan sa dalampasigan ng Tamontaka Il hanggang sa dalampasigan ng Bubong, Kalangan II (Bai Walk) sa Cotabato City. Tinatayang mahigit sa 50 mga bangka ang lumahok sa okasyon na ito.
Sa paradang ito ay naging tampok ang partisipasyon ng mga ministeryo, opisina, at ahensya sa Bangsamoro Autonomous Region in Muslim Mindanao o BARMM, at iba pang organisasyon. Ang kabuuan ng kapistahan ay sa pagtutulungan ng lokal na pamahalaan at sa suporta rin ni Cotabato City Mayor Mohammad Ali “Bruce” Dela Cruz Matabalao.